Implicadas no Cumio Mundial do Microcrédito

Como ben sabedes, nestes momentos estase a celebrar na cidade canadense de Halifax o Cumio Mundial do Microcrédito no que destaca a presenza do directo e fundador do Grameen Bank e recente premio Nobel da paz Mohamed Yunus. Implicadas/os no Desenvolvemento non quixemos faltar a esta importantísima cita e enviamos a dúas das nosas voluntarias, Blanca Rodríguez e Andrea Abreu.

Chegamos a Halifax o domingo 12 de novembro e a primeira sesión á que asistimos foi unha plenaria titulada “Factores que contribúen ao Crecemento Exponencial: Estudos de Caso para conseguir chegar á maior número de persoas pobres entre as máis pobres”. Nela debateuse a vital importancia para as institucións de microfinanciamento de atopar un equilibrio entre a súa necesidade de medrar e ser economicamente rendibles e a necesidade de lembrar sempre que traballan para axudar a superar o limiar da pobreza extrema e non para facer negocio á costa das persoas ás que ofrecen crédito.

A continuación, asistimos ao interesante obradoiro: “Cómo Garantir a Sustentabilidade do Impacto: Demostración da Contribución das Microfinanzas á Consecución dos Obxectivos de Desenvolvemento do Milenio”, no que participou Mohamed Yunus, Director do Grameen Bank. O obradoiro motivou un produtivo debate, no que atopamos especialmente interesante a intervención da boliviana Carmen Velasco, Directora Executiva de ProMujer, que tivo un discurso moi próximo ao de Implicadas e coa que tivemos a oportunidade de intercambiar impresións ao rematar o relatorio, poñendo así punto final ás sesións do domingo.

A xornada do luns comezou ás 9 da mañá (2 da tarde hora galega) coa sesión plenaria Alcanzando os Obxectivos de Desenvolvemento do Milenio e a Campaña do Cumio de Microcrédito de Reducir a Pobreza Extrema: Cales son as últimas novidades para medir de xeito rendible o movemento por debaixo do límite de 1dólar diario?

A seguir asistimos ao obradoiro Maximiza-lo Impacto: Innovacións na Integración Rendible das Microfinanzas coa Educación en Saúde. Nesta sesión, Isabel Rueda, directora de Educación e Capacitación da organización CRECER de Bolivia e Carmen Velasco, Directora Executiva de ProMujer, explicaron a achega integradora que teñen as súas respectivas organizacións, que ofrecen tanto servizos de microfinanciamento como de formación en saúde e capacitación laboral. Hosne Ara Begum, directora executiva de TMSS, de Bangladesh, sinalou que o acceso ao crédito é un dereito e que cómpre que se poida exercer mesmo nas poboacións máis afastadas. Para Begum, o analfabetismo e a enfermidade son as principais causas da pobreza e cómpre combatela a través da integración de servizos de educación non formal, promoción da saúde e acceso ao microcrédito. Isabel Rueda sinalou o importante papel do Estado no desenvolvemento, xa que ten responsabilidades no que atinxe á atención médica e social á poboación. Segundo o seu punto de vista cómpre realizar accións unificadas e complementarias (por exemplo, crear grupos que logo facilitan o labor do Estado para promover campañas de vacinacións, etc.). D.S.K. Rao, da India, organizador rexional para Asia da Campaña do Cumio do Microcrédito, explicou que o tipo de formación que se adoita realizar nos grupos baséase na aprendizaxe mutua e que é importante que os materiais empregados durante esas formacións estean adaptados á lingua e cultura locais.

No obradoiro Cómo contribúe o Microcrédito á Igualdade de Xénero, no que destacou a presencia de Ela Bhatt, Fundadora da Self-Employed Women Association, SEWA (Asociación de Mulleres Autoempregadas), da India debateuse a importancia do acceso ao crédito para o empoderamento das mulleres e os riscos que supón a súa perda de peso coma beneficiarias ou clientes das institucións de microfinanzas. Esta perda de peso vén motivada por diversos factores, por exemplo, a solicitude de crédito a nomes de mulleres que logo non teñen acceso aos cartos obtidos (que son en realidade para beneficio dos seus homes, pais ou fillos). Susy Cheston, Vicepresidenta Superior de Políticas de Opportunity International, salientou que, desgraciadamente, canto máis grandes, poderosas e economicamente rendibles son as institucións de microfinanzas, máis baixa é a porcentaxe de créditos que conceden a mulleres. No debate posterior, varias persoas de entre o público asistente, incluídas as representantes de Implicadas/os No Desenvolvemento, insistimos na necesidade de involucrar aos homes no proceso de empoderamento das mulleres, implicándoos nas tarefas máis “tipicamente femininas” e proporcionando unha serie de servizos complementarios (non financeiros) que axuden ás beneficiarias e ás súas comunidades a adaptarse e prepararse para os cambios que implica o proceso de empoderamento das mulleres e da superación dos roles de xénero.

Na sesión O Empoderamento das Mulleres a través da Alfabetización Financeira, Jayshree Vyas, Directora do Consello de Administración da Escola India de Microfinanzas para Mulleres, deu a coñecer algunhas das súas publicacións para formar a formadoras de grupos de aforro. Nestas publicacións propoñen unha ensinanza a través de dinámicas nas que destaca o diálogo como metodoloxía e en ocasións, o uso de imaxes. Isto é relevante especialmente nos casos en que as beneficiarias dos grupos de aforro teñen dificultades para ler e escribir. Monique Cohen, presidenta de Microfinance Opportunities, falou do proxecto Educación Financeira para Persoas Pobres e as publicacións da súa organización.

Bennet Benjamin, director do Centro para a Saúde Rural e a Educación Social, presentou na súa sesión, titulada Os Grupos de Autoaxuda: Un novo paradigma na redución da pobreza a microniveis, unha exhaustiva análise do sistema do grupos de autoaxuda e rotación de fondos, amosando a rede de repercusións sociais e comunitarias que teñen as actuacións asociadas ao aforro e o crédito, como a sensibilización nos campos da igualdade da muller, a sanidade, a motivación comunitaria, etc. Os numerosos exemplos presentados na sesión de casos de éxito motivaron un animado intercambio posterior á charla, no que se analizou, entre outras cousas, as vantaxes e desvantaxes do sistema dos grupos de autoaxuda, en comparación con outros sistemas de microcrédito, coma os bancos tipo Grameen, e outras institucións de microcrédito. Ademais, as representantes de IND tivemos a oportunidade de entrevistar a Bennet Benjamin e de gravar as súas opinións.

Na sesión Cómo facer as Microfinanzas realmente inclusivas: Chegando a persoas con discapacidade, Anne Leymat e Wanda Muñoz, representantes de Handicap International, presentaron un estudo moi interesante sobre as dificultades que teñen as persoas con discapacidade para acceder a microcréditos. Nesta comunicación salientaron a importancia de traballar para conseguir unha sociedade máis inclusiva que permita ás persoas con discapacidade desenvolver todo o seu potencial. Susan Sygall, co-fundadora e directora executiva de Mobility International, sinalou a dobre discriminación que sofren moitas mulleres con discapacidade e a súa paradoxal experiencia na Conferencia Mundial das Mulleres en Beijing, na que, malia a importancia que se deu á superación do situación de marxinación deste colectivo, as instalacións nas que se celebrou a Conferencia non eran accesibles, nin había intérpretes de signos.